Institut Français de Jérusalem Chateaubriand
علي أبو ياسين ممثل ومخرج فلسطيني. بدأ حياته المهنية عام 1990 كممثل قبل أن يخرج مسرحيته الأولى “المهرج” عام 1994. بدأ التمثيل في مسلسله التلفزيوني في أواخر التسعينات، وحصل على جائزة أفضل ممثل في مهرجان تونس عام 2004 عن مشهده الفردي “أبو عرب”. أخرج في عام 2010 مونولوج “غزة” ومع تلفزيون فلسطين في نفس الوقت. عُرض مشهده الفردي الأخير “المصور ” أكثر من 40 مرة كما وبُثّ على شاشة التلفزيون.
(مونودراما) – مسرحية
خبير اقتصاد وعلوم سياسيه
(يجلس ابو صخر وحيداُ بالمنزل يبدوا متوتراُ وخائفاُ وتنتابه مشاعر مختلفة الافكار تتصارع بداخله وفجأة يلتقط الجوال ويتصل بزوجته الموجوده هي وابنائه السته عند اخيها لزيارته)
ابو صخر : الو كيف حالك يا ام صخر اشتقتلك واشتقت للولاد انتوا مبسوطين
(تتغير ملامحه ) انا سخن مش عارف اذا انا سخن والا بارد كلامي مش طبيعي .
خلص خلص سكري تمك كل هادا علشان حكيتلك اشتقتلك .
المهم اسمعيني منيح وتقاطعينيش . لا لا لا ما تيجي . لا حول الله يارب
اسكتي واسمعي بدي احكي كلام مهم وخطير. لا متجوزتش عليكي . انا لاقي اكل
علشان اتجوز . وبعدين معاكي كبري عقلي و اسمعيني . اختي صبحية الي ساكنه برفح اجت زارتني
مش (يرد على زوجته ) مش عارف ايش حدفها عليه وهف على بالها تزورني من سنتين ما وصلت داري يمكن اشتقتلي. الحاصلو . ياعمي اسكتي خليني افهمك عندي لطشت الجوال بالارض .
هادا في واحد من الي رجعوا من مصر كاين معاه كرونه ومسلم عليها . المهم تعون الامن الصحي صايرين يدعبسه وراه ومع مين محتك ومع مين ا تكلم وصله انه احتك في اختي صبحيه .( يرد على صبحيه غاضباُ) الله يلعن ابو مخك الزفر احتك يعني سلم عليها حكي معاها زار جوزها بالبيت . مش اوف اوف . المهم ضلهم يساله وين راحت صبحيه لما عرفوا انها اجتني على مخيم الشاطيء لحقوها قبل ما تتحرك وتعدي ناس تانيه نزلوا عليه زي رواد الفضاء مكممين ومسكوها عندي بالبيت واخدوها على الحجر برفح . اه حجروها وحجروني بالبيت . اه حجروني . اه يا صبحيه انا محجور قال انا مشبوه انه ىيكون عندي كرونه وممنوع اطلع من الدار 14 يوم لغاية ما تتطلع نتايج التحليل وبعديها يا بيفلتوني يا بجددولي الحجر . اه زي المحكوم اداري صلاة النبي عليك فهمانه .خلاصة الحكي نبهوا عليه وشددوا كتير كتير ممنوع منع باتاُ احتك واتواصل مع أي حدا لاي سبب كان علشان هيك لازم تظلي انتي ولولاد عند اخوكي لغاية ربنا ما يفرجها ويثبت انه معيش كرونه او معاي . هو هو خلص تبكيش يا ام صخر قطعتي قلبي . اخوكي بده يحكي معاي اعطيني ياه . الله يسلمك يا ابو ربحي . ايش مبروك على ايش بتبارك على المصيبه الي انا فيها . ( يرد على ابو ربحي ) والا مصيبه والا حاجه مخافش (ينصت ) انا زلمه كبير واسمعت انه الكارونه بتموت الكبار بالسن
(ينصت ) اه سمعت عنهم التنين الختياريه الي كانوا جايين من الباكستان اظن اول تنين انصابوا بالكارونه بغزه اه عارف انه ما صار فيهم اشي وصحتهم اجت على كرونه
هدول ربيانين على البيض والفراخ البلديه انا عظمي رقيق خايف كرونه تلفني تزتني بسابع ارض. معاك معاك (بنصت باهتمام ) كابونات . مساعدات . دعم . راح اتنغنغ . يعني اكيد هالحكي يا ابو ربحي الي بينصاب بالكارونه بيغرقوه بالمساعدات معقول اخيراُ الدنيا راح تضحكلي
الله يبشرك بالخير . خلص والا يهمك كل المساعدات راح احولها عندك راح افهمهم أي حد بده يساعدنا باشي انه مرتي وولادي عندك يحول عليك مباشرة ودير بالك على ام صخر ولأولاد اسمع كرت الجوال خلص قاعدين بيحكولي لديك دقيقه بهذا الاتجاه عبيلي كرت من ابو شهر انا راح احكي كتير هالفتره ما انته عارف معا ي كرونه يازلمة سلفه تحت الحساب .(يطفي الجوال)
(ابو صخر مبتهجاُ وفرحاُ)
اخيراُ الدنيا ضحكتلي ينصر دينك يا صبحيه جيتي وجبتي الرزق معك الدعم و الكابونات راح تصير تهيل هيل ( يرقص ) والله يا ابو صخر لتتنغنغ نغنغنه
ابو صخر في الحجر . ولعت يا ولد . والله بينفع عنوان فيلم ابو صخر بالحجر.
والله اللي صار مثل الافلام في دقايق حياتي اتشقلبت تحتاني فوقاني . او فوقاني تحتاني . صرت مش فاهم اشي . معقول تزبط ويصير معاي مصاري
وهي وقتيش زبطت. يازلمه بيكفيك تشائم . ربنا بيكسر جمل علشان عشوة واوي . ونعم بالله .
(نسمع اصوات اطفال تأتي من الشارع وتحديداُ عبر شباك منزل ابو صخر المطل على الشارع والمنخفض بشكل حاد حتي المار بجوار المنزل لو التفت من الشباك لشاهد ابو صخر بالداخل الاطفال المتجمهرين يهتفون)
يا ابو صخر يا كورنا يا الله بسرعه ارحل من هونا
يا ابو صخر يا عيان يا عميل الامريكان
(ابو صخر مخاطباُ الاطفال بصوت مرتفع )
الله يجازي شيطانكم ولك روح العب بعيد انت وياه انا مش قادر اقرب عليكم الصحة الوقائيه نبهوا عليه ابعد عن أي حدا ثلاثه متر والله اقولكم خليكم بتنفع مطلع اغنيه
(يلتقط الة العود ويبدأبالغناء والعزف )
يا ابو صخر يا كورونا يالله بسرعه ارحل من هونا
بتزبط بس بدها كمان مقطع (كوبليه )
(نسمع صوت جاره ابو حسن ينهر الاطفال فيبتعدون )
امشي انت وياه العبوا بعيد هان خطر . حمدالله على سلامتك يا ابو صخر
الله يسلمك يا ابو حسن
(يرن جوال ابو صخر ) انت كيف عرفت . الله يسلمك لسه باستني نتيجة التحاليل اخدوا مني عينه وبعد 14 يوم بيفكوا عني الحجر.(منبهاٌ) ويمكن يمددولي . شكرا يا حبيبي معلش استأذنك مش عارف مين بيرن عليه
(يطفيء الجوال وينتظر)
يمكن هدول تعون الكابونات بدوا يرنوا
(يرد على الجوال)
الله يسلمك.من وين ادريت . ع الفيس بوك كل البلد عرفت انه عندي كارونه . الله يطمنك . كويس كويس . الا انت مين . اي بنك الي نسيته بنك فلسطين والا العربي ذكرني (محدثاُ نفسه) بلش الدعم يهل . نعم كنت قاعد في البنك الي وراي بالصف السادس طيب اسمع ابصر مين بيرن عليه
(يفصل يرن الهاتف . ثم يفصل ثم يرن مباشره وهكذا عدة مرات ثم يفتح الخط ويرد غاضباُ)
الله يسلمك محجور واخدوا مني عينه وباستنه النتيجه (مستذكراُ) ويمكن يمددولي وهي طفية جوال ( يطفيء الجوال)
عمي يعميكم شو هالبلد هاي اذا واحد عطس برفح اهل بيت حانون بيحكوله يرحمكم الله . هادا قبل كورونا هلقيت الي بيعطس بيشخرولوا .
طبلوا راسي . طيب يمكن حد يرن من تعون المساعدات . انت هي الي بتفكر فيه . كبر عقلك يا ابو صخر يمكن يطلع معاك كرونه عن جد
والله على هوا ما باسمع ما باتحمل معاها غلوه بيقولك طقه طقه على كبار السن . يم . بتجيب اجل الواحد بيومين . انا مش كبير كتير لسه ما صرت ستين . الكلام على الي فوق الستين .وانا مش عيان . شوية حسسيه وكحه بالصدر بتروح وتيجي بس انا تمام .يا شيخ التهي واسكت قال تمام قال
مش ساكت. نعم ماليش اكم من ساعه وبديت احكي مع حالي اروح اتسلي بالراديو (يفتح الراديو يسمع المذيع يتحدث عن مساعدات للشعب الفلسطيني بسبب جائحة كورونا)
تبرعت قطر بمبلغ 150مليون دولار لقطاع غزة بسبب جائحة كورونا والتخفيف عن المصابين
انا المصابين (يبدأ بعمليه حسابيه في راسه ) احنا كلنا اكم مصاب بغزة حوالي 10 قول 15 تمام 15 ÷150 مليون دولار بيطلع لكل نفر منا 10000000مليون دولار والله لتلعب بالمصاري لعب يا ابو صخر . بس والله كتير هيك . الناس مش لاقيه توكل . باتبرع بجزء للغلابه . خلص بديت تبعثر في المصاري من هلقيت . ما هو انا لسه ما حسبت ايش بده يخش عليه من الاتحاد الاوروبي وباقي الدول العربية والدول الاسيويه والعالم . لازم افتح الجوال (يفتح الجوال يرن فوراُ ابو ربحي زوج اخته )
خير يا ابو ربحي بدك تجيني بامر ضروري جداُ لا يا حبيبي لا تيجيني ولا اجيك احكيلي ايش بدك على الجوال انت عارف انا ممنوع استقبل حدا ( مخاطباُ نفسه ) والله عال بيفكرني اهبل علشان يصير عددنا 16 وبدل ما يطلعلي عشره يطلعلي تسعه ..؟
شو الامر الضروري يا ابو ربحي اتكلم (يستمع)نعم مرتي بدها تبعت معاك علف للجاجات وانت تعلفهم علشان انا ما اقرب عليهم خايفه لأعديهم . يعني هي خايفه على الجاجات ومش خايفه عليه .(يستمع) عارف انه هم الحيله والفتيله والي بيفطروا الولاد قلها ما تخاف الجاج فش في اشي بعدين انا لسه ما انعرف معايه كرونه والا معيش . اذا اتصالاتكم علشان تتطمنوا على الجاجات ما حد يتصل عليه (يغلق الجوال )
(نسمع صوت قادم ينادي من الشباك المطل على الشارع )
المريض ابو صخر غداك وعشاك على الشباك
(يذهب ابو صخر يحضر كرتونه كبيره ممتلئه بالطعام والفاكهه والحلويات نادراُ ما اكل مثلها يفتح الكرتونه مندهشاُ)
اول مره يوعدوا ويصدقوا حكوا بدهم كل يوم يجيبولي وجبات وهيهم جبوها
بس انسيت اسمهم (يحاول ان يتذكر) الصحه والا لجنة كرونا . يمكن وين في كرونا بتلقونا . (يتفقد الكرتونه ) فراخ وعلب تونه على اساس لو ما اجي على بالي فراخ مرتديلا جبنه تفاح موز شمام فراوله خبز حلويات . ايش هالعز .والله هادا اشي بيخوف معقول علشان معايه كرونه بدهم يطعموني كل الي بنفسي قبل ما اموت . ليش لأ اللي محكوم عليه بالاعدام قبل ما يعدموه بيجبوله الاكلة الي بيحبها معقول يعدموني ايش يعدموني انسيت انك راح تصير مليونير . بيعملوها . وبيعملوا ابوها كمان وخاصة انك راح تصير مليونير . لا يا زلمه تكبرهاش . انته التاني السيارة معاهم مليانه كراتين . صحيح هاي الكراتين
وين بيودوها كل المصابين بالكارونه قردين وحارس .يمكن في كتير غيري هاي اسرار دوله .خليك بحالك يا ابو صخر وملكاش بغيرك . اه احسن اشي اضل بحالي . ( متأملاُ الاطعمه )والله ما انا عارف كيف بده يجيني نفس اكل بدون ام صخر والاولاد يمكن لو يشوفوا هادا الاكل ليغمي عليهم من الفرحه ويترجوني اعديهم . انا لازم ابعت الاكل الهم . بس انا مسكت الكرتونه و هلقيت تلوثت بالفيروسات .تعبت عن اخرها فيروسات . (يلتقط تفاحه ) بتلاقي الفيروسات بتجري جراي عليكي (ويخمشها) بس مش مبين كتير طعم الفيروسات ( يتذوق جيداُ) امضغ منيح علشان لو فيه فايروس اكز عليه بسناني اهرسوا هرس . افجمه تفجيم . المره الجاي يا ام صخر اذا ضلينا عايشين باخليلك الكرتونه
( يفتح الراديو يستمع الي صوت المذيع )
شكراُ للخبير بالاقتصاد والعلوم السياسية فوزي ابو موزه على هذة المداخله الهامه ومعنا مصاب من مصابي كرونه سوف نحاول ان نتصل به ليخبرنا عن تجربته بالمرض والاحتياطات الواجبه والرعايه التي يتلقاها . (يرن جوال ابو صخر وهو يأكل موزه يضحك ابو صخر )
بيقولك ابو موزه همممم يا زلمه رد خلينا نتعلم منك ونعرف شو نساوي
صوت المذيع : يبدوا ان المصاب ابو صخر بعيداُ عن الهاتف لانه يرن ولا يرد
ابو صخر : ابو صخر هادا انا ويمكن هو بيرن عليه ( يفتح الهاتف )
الو الو انا ابو صخر
المذيع : ابو صخر الناس بدها تعرف شو حاسس هل في اعراض كرونه ظهرت عليك
ابو صخر : زي ايش الأعراض مثلاُ
المذيع : عطس مثلا بتعطس
ابو صخر: منيوم ما نولدت وانا باعطس واذا بدك هلقيت باعطسلك
المذيع : لا تعطسلي والا اعطسلك طيب بتحس في ديقة نفس بصدرك
ابو صخر: من يوم الله ما خلقني عندي حسسيه وديقة نفس بصدري ومعي التهابات كمان ما حسيت شي تغير عليه
المذيع : في مخاط بينزل من انفك
ابو صخر : مناخيري عمرها ما نشفت من وانا صغير مرشح
المذيع : بتحس بوجع راس
ابو صخر : واحد عنده ست ولاد وفقير وعايش معاهم في بيت قد الخم بتسأله بتحس بوجع راس . انا مش متذكر وقتيش راسي ما كان يوجعني . بس الصحيح هاليومين علشان ام صخر راحت عند اخوها والدار فضيت عليه راسي رايق شويه . والله انا حابب افيدك وما افشلك بس انت ما جبت اشي جديد اذا بدك انت أحكيلي ايش احكيلك وانا باحكيلك . والله بتنفع مطلع اغنيه (يدندنها ملحنه ) انت احكيلي ايش احكيلك (المذيع مقاطعاُ)
المذيع : ابو صخر طيب في اهتمام من المسؤلين بحالت
ابو صخر: اه كتير مهتمين حتي انا مستغرب مش عوايدهم وقلبي نقزني. جابولي اكل وفواكه أشكال وألوان بس ما جابولي كمامة وقفازات يعني كفات قال معندهمش . لما يتوفر بدهم يجيبولي بس جابولي ديتول وكلور وانا بأكره ريحة الكلور. انا مش مبسوط حاسس حالي ماليش هيه من غير كمامة وقفازه
زي زي المواطن العادي . هو انا حقي ناقص واللع عال
المذيع : اخر سؤال واحنا بعدين بنرجعلك شو الرساله الي بتحب توجها للعالم
ابو صخر :فكوا الحصار وبنوا الدار وجوزوا ابني الاختيار لانه قرب ينهار والناس بدها بندوره وخيار مع شوية اعمار والسلام عليكم من واحد محتار (يطفيء الجوال)
والله هادي بتنفع غنيوه خليني اجرب الحنها (يمسك العود)
(نسمع صوت ام صخر تصرخ على ابو صخر من الشارع)
صوت ام صخر: طل عليه هان. اسمعت جابولك كابونات اشكال والوان بتقولش في الك عيله اوديلهم والا نسيتنا خلص
ابو صخر: كيف انساكم يا ام صخر ما الك عليه يمين اللقمه ما راضيه تنزل بزوري من دونكم بس كل اكلي تلوث المره الجاي والكرتونة بالشارع راح اتصل عليكي تاخديها من بره لبره.
صوت ام صخر: ضلك طلع حجج ملوث ومش ملوث .يا زلمه اخوي فقير واحنا عيله عددنا كبير وحجرك راح يطول احكي مع أي حد من هالمسؤلين البركات يساعدونا اسمعت في دعم كتير وصل البلد اعتبرونا جاج اعلفونا اولادك مش لاقيين يلبسوا حتي من الباله
ابو صخر: ولا يهمك يا ام صخر انا اليوم زلمه مهم كل الصحفيين بيتصلوا عليه راح أوصل صوتك لكل العالم وبطريقتي الخاصة .اوعي تفكري راح انساكم للحظه .مش انا الي لما ربنا يعطيه ينسي مرته واولاده بس انتي اصبري شويه
صوت ام صخر :انا نبهتك وانت حر . اروح اشوف ايش بدي اغدي الاولاد. خود راحتك برطع بالدار لحالك . بتلقيك مكيف ما صدقت تيجيك حجة الكارونا علشان تتريح مني (تذهب)
ابرطع هو الصحيح اول مره باحس أبرطعه زي هيك بس موضوع الكرونه مقلقني .معقول يطلع عندي كرونه. اخ حاسس وجع راس .معقول هادا من الكارونه والا من ام صخر وجع راسي كان دايماُ يكون خفيف .هادا قوي شوي
ايش هالقصه هاي. انا هلقيت بدي اقعد اتوهم . ليش اتوهم ما هم حاجريني علشان الكارونه ليش يعني بدوش يطلع عندي كرونا ما يمكن عن جد عندي كرونة. انا لازم ادير بالي اكثر. اه لازم ادير بالي اكثر . كيف يعني ادير بالي . ايش اعمل يعني. اسمعتهم بالراديو بيقوله ما تعمل اشي بس اتغذي منيح وخود مسكنات وخلص
(يلتقط الهاتف يرجع الي رقم المذيع الذي اتصل به)
المذيع: ومعنا ابو صخر ومفاجأة حلوه . وحابب يوجه رساله بس المره بده يغنيها على العود
(يبدا ابو صخر يغني)
يا أم بركات يا أم بركات
بدنا علف للجاجات
فكي الصره وحلي الكيس
يا أم بركات
بعت الجاكت والقميص
يا أم بركات
كرهتينا بالخميس
والجمعه وباقي الأعياد
ياأم بركات
يا أم بركات الحاله حاله
والناس بتلبس من الباله
حتي الموظف مديون
يا أم بركات
لا هو عاقل ولا مجنون
يا أم بركات
فطي نطي لمي ولادك
من غزه وباقي لبلاد
يا ام بركات
يا أم بركات الزعل طال
خلينا نغير هالحال
خلي الأجندات بعيد
يا أم بركات
بدنا نشبك أيد بأيد
يا أم بركات
شب مشورب ع الحديد
بده يهاجر عنده ضاع
يا ام بركات
صوت المذيع : اغنيه رائعه ومعبره وسوف نأتي اليك لنسجلها فيديو وننشرها عبر مواقعنا في السوشال ميديا . ومعنا مداخله من الخبير في الاقتصاد والعلوم السياسية محمد ابو فروه يحدثنا عن الأثار الاقتصادية التي انعكست على تجارة البترول على اثر جائحة كورونا
(يغلق الراديو معلقاُ)
ابو فروه خبير اقتصاد وعلوم سياسية . بس كيف بدهم يسجل معاي يمكن بدهم يصورني وانا بعيد ثلاثه متر من غاد من عند الشباك
(موسيقي مناسبه تعبر عن مرور الزمن عشرة ايام . ابو صخر يجلس بجوار الراديو في قمة التركيز او نشاهد ابو صخر في اوضاع جسديه مختلفة يتنقل ما بين الكرسي والمطبخ والسرير… تترك للمخرج . تتوقف الموسيقي . يتوجه الي قفص يضع به عصفوره محدثاُ اياه(
روحي طلعت زهقت صارلي عشر ايام على هالحال الله لا يجبرك يا صبحيه يعني حبكت تزوريني هالايام ما الكل بيحكي ممنوع الزيارات وممنوع البوس وممنوع السلام. من يوم ما نبهوا على الناس والزيارات كثرت والبوس زاد والي ما كان يسلم صار يسلم احنا هيك دايماُ بنعمل بالعكس .اذا بيت نقصف والدفاع المدني قال للناس ممنوع التجمهر لينزلوا كمان صاروخ بتلاقي الناس فوق بعض مكان القصف. اذا البلديه حذرت من النزول في البحر لالنه ملوث بيصيروا يرموا حالهم رمي بالبحر. وقتيش نخلص هالاربع ايام ويجوا ياخدوا العينه الجديده ويفحصوا وخلص عن جد زهقت (مخاطباُ العصفور) وبتلاقيك انت التاني زهقت مثلي. بس ما تخاف ما راح أعديك بيقولك حامل الفايروس ممكن يعدي البسس والفايروس ما بيأثر بالبسه. والبسس ممكن تعدي بعض (مخاطباُ العصفور) اه الحكي هادا اكيد . تخافش لو عندك اشي لبين عليك . يا زلمه انا هيك اسمعت بالاخبار. ما انا صرت سامع اخبار بحياتي ما سمعت قدها. وانا بأستنه يكتشفوا علاج للمرض
كل يوم طالعين بقصة مره الفايروس بينتقل من متر. بعدين من ثلاثه ولا بينتقل من خلال الاسطح. وكمان طلع بينتقل بالهوا ومره بدنا نعالج من خلال اخد بلازما من شخص مصاب ومتعافي الفايروس بيكون عنده ضعيف ونحقن شخص مش مصاب تطعيم يعني. ومرة ترمب بيقولك احسن علاج هيكسوكوبرين علاج الملاريا. ومره اشرب ينسون وكمون ولمون. جننتوني
وكله كوم والبترول كوم الي سعره بالبورصه صار صفر وطبعاُ لازم تفهم يا ابو صخر ايش يعني صفر وكيف بيصير سعر نقله اغلي من سعره وكيف صغار المستثمرين تدمروا وكيف ترمب بيهدد بالسعودية وروسيا يوقفوا ضخ بترول مع انه بالاول كان مبسوط اعتبر نزول سعره دعايه لحملته الانتخابيه.
والحرب البارد ه او الحاميه بين امريكا والصين قال الصين خبت معلومات طبيه عن العالم ومنظمة الصحه متأمره معها. وراح ترمب وقف الدعم عنها .وايطاليا حاسه باضهاد العالم تركها لوحدها .والسويد مش سائله عن كرونا والي جابوها. (متنبه لنفسه ولحديثه)
والله يا ابو صخر صاير تفهم بالسياسة والاقتصاد والطب اكثر من هدول الي بيطلعوا بالفضائيات يقلك معكم الخبير بالاقتصاد والعلوم السياسية ابو موز
والله لبقالك اكثر منهم . يمكن هاي الشغله بدها شهاده . يا زلمه هو حد سائل. انت لما بدك تحلل المذيع بده يقلك وين شهادتك. كله صار دكتور في هالبلد الكل زعيم وفهمان و بيعمل الي بده ياه. ما حدا سائل على حدا كل يوم بنسمع قصص اشكال والوان فلان خبير بطب الاعشاب وفلان بيعالج بالحجامه وفلان انتقل من الفلاحه الي الصحافه وفلان تحول من من الضياع الي المذياع واخينا بعد ما كان ضايع صار قائد. فوضي وقايمه وما حد فاهم حاجه. والناس بتصدق وبتتأقلم بسرعه يمكن هاي فرصتك يا ابو صخر. قال ايش بده ياخد الريح من البلاط ما انت قضيت عمرك كله غلبان وملطم. المثل بيقولك حط راسك بين الروس وقول يا قطاع الروس. و ما عاش ابو قلب الضعيف. ويعيش باللزات كل مجازف ويموت بالحسرات كل جبان. الله عليك يا ابو صخر أي حراج على اتخن محلل يرص هالامثله والاشعار زي ما رصيتهم . يخلف عليكي يا كرونا نورتينا
)يرن جواله يشاهد الرقم(
هاد المذيع يرد) الو معكم الخبير بالكورونا والعلوم السياسيه ابو صخر. ابو صخر ايش (يتذكر اسماء الخبراء ويراجع ذاكرته ) ابو موزه ابو فروه (
ابو صخر ابو ليفه اه ابو ليفه علشان انظف اول بأول شو بتحب تسأل عن ايش بدك تستفسر عن العالم ما بعد كارونا والا عن التحولات الاقتصاديه نتيجة الفايروس. بدك تسمع اغنية يا ام بركات. لا لا لا انا بطلت أغني. الاغاني فش من وراها فايده الفنانين بهالبلد مظلومين بدي اشتغل خبير اقتصاد وعلوم سياسيه كلهم لابسين بدل مبين عليهم العز اذا بدك اسأل بالسياسه بالاقتصاد اما اغاني مش مغني بالمره (يقفل في وجه المذيع)
والله عال كتير صاروا يتصلوا بدهم اغنيلهم حتي بطلوا يستفسروا عن حالتي الظاهر نسيوا اني مصاب كرونا او يمكن عندهم معلومات اني مش مصاب. معقول بدهم يشلطولي )بالمصاري الي بدها تطلعلي. (ضاحكاُ) عن جد مصدق حالك. يا زلمه لو جابوا كل مال الدنيا على هالبلد كبيرك بيطلعلك 100 دولار قال ايش عشره مليون (يستمر بالضحك
وبديش استقبل اخو مرتي لينعدي مني ويطلعله حصه ها هاو حلوه هاي
أي انا ما خليت رابط مساعدات الا بعتلهم الي ما حد رد والا حد جاوب والا معترفين في اصلاُ.
ايش عامله ام صخر والاولاد من وين بيصرفوا الدول المحترمه طلعوا راتب لكل الناس الي تضررت من كورونا. الناس بغزه تعبانه اصلاُ الحصار هد حيلنا وطلعتلنا كرونا بالسحبه تزيد الطين بله. من يوم ما خلقنا واحنا هيك بنطلع من مصيبه بننزل بمصيبتين .خد وضاري ع اللطام.
اشتقتلك يا ام صخر واشتقت للاولاد نفسي احضنهم واحضنك معاهم. يخرب بيتكم اشتقت لدوشتكم لجرايكم بالبيت لزعاكم للمة الصبح على صحن الفول والحمص .البيت صار خراب كأنوا مهجور اله الف سنه. لا حس والا خبر.
لماذا تركت الحصان وحيداُ. لكي يؤنس البيت يا ولدي فالبيوت تموت اذا غاب سكانها. والله صدقت يا درويش.
بطلت قادر اتحمل الموت ارحم. انا لازم اطلع بدي اروح اشوف مرتي وولادي
.
امشي بالشارع اروح على البحر اقعد اغني واعزف على العود اشم هوا نظيف يا اخي نفسي بسندوتش فلافل بدي اشوف الناس احكي معهم اسلم عليهم. اه اسلم عليهم واحضنهم. بلا كارونا بلا بطيخ لو في عندي كارونه كان بين عليه صارلي اسبوعين محجور. الموت ارحم من هاي العزله لازم اطلع كارونا نفسها مش اصعب من الحصار. الحريه اغلي شيء بالوجود اول القصه فرحت فكرت راح يطلعلي مال من وراء هالقصه واتاري مال الكون ما بيسوي تمشايه انا وولادي ومرتي على شط البحر وناكل دره مسلوقه. الله الله لازم اطلع (يهم بتغيير البيجامه او الترنق ليخرج ثم يتوقف) قبل اسبوعين واحد طلع من الحجر نشره صورتوا بالتلفزيون واسمه بالاذاعه وعلى الفيس فضحوه فضيحة بني هلال. لغاية ما مسكوه ورجعوه. بلاش يعملوا في هيك وايش هالقصه هاي. باروح عليهم على السكت ويمكن اولادي يهربوا مني يخافوا لاعديهم. معقول يعملوها. وليش لأ ييعملوها. ياروح ما بعدك روح. شو في هو انا انجنيت افرض فعلاُ عندي كارونه يعني اعدي عيلتي
لا لا لا يا سيدي فش عندك زفت متهيئلي كل غزه فش فيها كرونه.
بس لازم الحجر يفك عني رسمي علشان اقدر امشي بالشارع لانه هلقيت اذا فتحت باب الدار وطلعت كل الشارع راح يشرد مني على اخر الدنيا.
يا الهي شو هالكرونه هاي الي رعبة الدنيا قعدت الغفير والوزير بالبيت القاده والزعماء الملوك والصعاليك كله محجور ومرعوب. كارونا ملكة العالم فايروس صغير احتل العالم اقوي من اقوي جيش وسلاح. قعدت العالم بالبيت. بس اول مره بأحس انه في مسواه كنا لحالنا محاصرين اليوم العالم محاصر معنا يالله خليهم يحسوا فينا شويه يمكن يرفعوا الحصار عنا.
معقول العالم بعد كارونا يتغير. يمكن يتغير ويمكن ما يتغير بس الي انا متأكد منه. انه انا بعد الكارونه تغيرت فهمت شغلات كتير اهم شيء انه لحظة حريه بتساوي كل مال الدنيا وانه الاشياء الي بتكون تدايقك اليوم ممكن تسعدك بكره. وانه العالم بكل الحضاره الي وصلها اضعف من فايروس. وانه حالك ممكن يتغير بلحظه.
(يرن جواله يتصل ابنه به)
هادا ابني صخر الو. ايش في. حد منكم جراله حاجه. ايش. مش فاهم عليك يوتيوب ايش يعني ترند. اغنيتي. ام بركات جابت اعلي مشاهده ملايين سمعوها. قناه انت عملي قناة يوتيوب و ايش يعني. يوتيوب طلب رقم حسابي وراح يحولولي 50 الف دولار. نعم عن جد بتحكي يعني انا صرت غني خمسين الف دولار أي انا بحياتي ما مسكتش الف. ايش نعم عمتك صبحيه اتصلت على امك تبشرها انه الزلمه الي اشتبهوا فيه انه مصاب بالكارونا وعدانا نتيجة تحليله طلعت سلبيه وفكوا عنها الحجر وعندهم اتصله عليه يبلغوني طيب جهزوا حالكم علشان تيجوني احطكم بحضني وابوسكم.
الظاهر الدنيا اخيراُ بدها تضحكلك يا ابو صخر وفعلاُ حالك يتغير بثانيه
وارجع اغني واعزف على العود كل كارونا وانتوا سالمين
(يرن الهاتف )
الامن الصحي (مبتهجاُ) اعرفت اعرفت والله اعرفت صبحيه حكت لمرتي بخاطركم مع السلامه. (يغلق الهاتف)
واخيراُ تحررت. انا لسه ما تحررتش. المفروض العالم كله يصير حر. حتي هذا العصفور (يذهب الي قفص العصفور يخرجه ويطلق سراحه) بس والله انضحك عليك يا ابو صخر وقعدوك بالحجر. والله بتنفع مطلع اغنيه خليني اروح الحنها (يخرج من المنزل)
النهايه
تأليف
علي ابو ياسين